* ယနေ့ည မှာ လီဗာပူး – ချယ်လ်ဆီး ဥရောပ စူပါဖလား ဗိုလ်လုပွဲ ကို အမျိုးသမီး ကွင်းလယ်ဒိုင် က တာဝန်ယူ ကိုင်တွယ်မယ့် အနေအထား နဲ့ ပတ်သက်ပြီး ချယ်လ်ဆီး နည်းပြ ဖရန့် လမ်းပတ် က ဒါဟာ သတင်းကောင်း တခု ဖြစ်သလို ၊ သမိုင်းသစ် ရေးထိုး နိုင်မယ့် အနေအထား ဖြစ်ကြောင်း ၊ အမျိုးသမီး ကမ္ဘာ့ ဖလား မှာ ဒီ အမျိုးသမီး ဒိုင်တွေရဲ့ မှန်ကန်တဲ့ ဆုံးဖြတ်ချက် တချို့ကြောင့် အားရ ရသလို ၊ ယနေ့ည ပွဲစဉ် အတွက်လည်း သူတို့ရဲ့ ဆုံးဖြတ်ချက် တွေ မှန်ကန် နိုင်ဖို့ မျှော်လင့် ထားကြောင်း မနေ့က သတင်းစာ ရှင်းလင်းပွဲ မှာ ဖွင့်ဟ ပြောဆို ခဲ့ပါတယ် ။

* ချယ်လ်ဆီး အသင်း ရဲ့ ယနေ့ည မှာ လီဗာပူး နဲ့ ရင်ဆိုင် ကစားမယ့် ကစားသမား စာရင်း မှာ ဒဏ်ရာ က ပြန်လည် သက်သာ လာတဲ့ ခံစစ်မှူး ရူဒီဂါ ၊ ရာသီကြို ခရီးစဉ် တွေကို လိုက်ပါ ထားခြင်း မရှိခဲ့တဲ့ ဝီလီယံ တို့ ပြန်လည် ပါဝင် လာပြီ ဖြစ်ပါတယ် ။ ချယ်လ်ဆီး အသင်း နည်းပြ ဖရန့် လမ်းပတ် ကတော့ ၄င်းတို့ ၂ဦးလုံး ဟာ ဒဏ်ရာ ပြန်လည် ကောင်းမွန် လာပြီ ဖြစ်ပေမယ့် ယနေ့ည ပွဲ အတွက် အရန်ခုံမှာပဲ ပါဝင်နိုင်ဦးမယ် လို့ ဆိုခဲ့ပါတယ် ။

* ချယ်လ်ဆီး အသင်း နည်းပြ ဖရန့် လမ်းပတ် က လက်ရှိ လူငယ် ကွင်းလယ်လူ မေဆင်မောင့်တ် ကို ၄င်းနဲ့ နှိုင်းယှဉ် နေခြင်း နဲ့ ပတ်သက်ပြီး မေဆင်မောင့်တ် နဲ့ ၄င်းတို့ဟာ ကစားပုံ မတူညီတဲ့ သူတွေ ဖြစ်တာကြောင့် မနှိုင်းယှဉ် သင့်ကြောင်း ၊ မောင့်တ် ဟာ အရည်အသွေးကောင်း တွေ ပိုင်ဆိုင် ထားပြီး အလုပ် အရမ်း ကြိုးစားသူ ဖြစ်ကြောင်း နဲ့ သွင်းဂိုး တွေ ၊ ဂိုးဖန်တီးမှု တွေ အတွက် အသင့် ရှိကြောင်း ထုတ်ဖော် ချီးကျူး သွားခဲ့ပါတယ် ။

* ချယ်လ်ဆီး အသင်း နည်းပြ ဖရန့် လမ်းပတ် က အဓိက တောင်ပံ တိုက်စစ် ကစားသမား အီဒင် ဟာဇတ် ချယ်လ်ဆီး ကနေ ထွက်ခွာ သွားခဲ့တာ ၄င်းတို့ အတွက် ဆုံးရှုံးနစ်နာမှုကြီး တခု ဖြစ်ကြောင်း ၊ သူ ကိုယ်တိုင်လည်း အီဒင် ဟာဇတ် ကို အားပေးတဲ့ ပရိသတ် တယောက် ဖြစ်တာကြောင့် သူ့လို အသင်း အတွက် အထောက်အကူ အများကြီး ပေးခဲ့တဲ့ ကစားသမား တယောက် ကို သတိ ရနေမှာ ဖြစ်ကြောင်း ၊ သို့ပေမယ့် လည်း လက်ရှိ ကစားသမား အစုအဖွဲ့ အတိုင်းပဲ ရှေ့ဆက် သွားရမှာ ဖြစ်ကြောင်း မနေ့က ပွဲကြို သတင်းစာ ရှင်းလင်းပွဲ မှာ ဆိုခဲ့ပါတယ် ။

* ချယ်လ်ဆီး အသင်း နည်းပြ ဖရန့် လမ်းပတ် က လက်ရှိ ချယ်လ်ဆီး နည်းပြ ရာထူး ဟာ သူ့ အတွက် ရိုလာကိုစတာ စီးနေရသလို ခံစား ရသေးခြင်း မရှိကြောင်း ၊ ယူနိုက်တက် ကို ၄ဂိုးပြတ် နဲ့ အရေးနိမ့် ခဲ့ခြင်း ကို ရိုလာကိုစတာ စီးရတဲ့ ခံစားချက် တခုလို့ သတ်မှတ် ချင်ရင်တော့ ရနိုင်ကြောင်း ၊ ပြီးခဲ့တဲ့ ဘောလုံး ရာသီ တုန်းက ဒါဘီ အသင်း ကို ကိုင်တွယ်စဉ် က ဒီလိုမျိုး အခိုက်အတန့် များစွာ ခံစား ခဲ့ရကြောင်း ဆိုခဲ့ပါတယ် ။

* ESPN သတင်း ဌာန ရဲ့ ဖော်ပြချက် တခု အရ ချယ်လ်ဆီး အသင်း ရဲ့ ဘရာဇီး လူငယ် တောင်ပံ ကစားသမား လူးကပ်စ် ပီယာဇွန် ဟာ တူရကီ ကလပ် ဘက်ဆစ်တပ် အသင်း ရဲ့ ကမ်းလှမ်းမှု ကို စောင့်ဆိုင်း နေပြီး ဘက်ဆစ်တပ် ဖက်က ၄င်းကို အပြီးသတ် ခေါ်ယူဖို့ ပေါင် ၅သန်း နဲ့ ကမ်းလှမ်းဖွယ် ရှိနေကြောင်း သိရပါတယ် ။ ပီယာဇွန် ဟာ ချယ်လ်ဆီး အသင်း ကို ရောက်ရှိ လာတာဟာ ဆယ်စုနှစ် တခုစာ ရှိလာ ပေမယ့် စီနီယာ အသင်း အတွက် ဘယ်နှပွဲ မှ မကစား ခဲ့ရတာကြောင့် အသင်းပြောင်းဖို့ စီစဉ် နေပြီ ဖြစ်ပါတယ် ။

* ချယ်လ်ဆီး အသင်း အကယ်ဒမီထွက် တိုက်စစ်မှူးဟောင်း ကာတန်ကိုးလ် က သူ့ အနေနဲ့ ကစားသမား ဘဝမှာတုန်း က အခုလို ချယ်လ်ဆီး အသင်း ကစားသမား ခေါ်ယူခွင့် အပိတ် ခံရတဲ့ အနေအထား မျိုး ကို ကြုံတွေ့ ချင်ခဲ့ကြောင်း ၊ လက်ရှိ လူငယ် တိုက်စစ်မှူး တမ်မီ အေဘရာဟမ် အတွက် ဒီ အနေအထား ဟာ ပွဲထွက်ခွင့် ပုံမှန် ရရှိဖို့ အခွင့်အရေး ဖြစ်ကြောင်း ၊ သွင်းဂိုး တွေနဲ့ ပွဲထွက်ခွင့် တနေရာ ကို လှမ်းဆုပ်ဖို့ အခွင့်အရေး ရလာပြီ ဖြစ်ကြောင်း Goal နဲ့ အင်တာဗျူး မှာ သုံးသပ် ပြောဆို ခဲ့ပါတယ် ။

* ချယ်လ်ဆီး အသင်း ရဲ့ အကယ်ဒမီ လူငယ် ကွင်းလယ်လူ ဘီလီ ဂီလ်မာ ဟာ လီဗာပူး နဲ့ ဥရောပ စူပါဖလား ဗိုလ်လုပွဲ အတွက် ချယ်လ်ဆီး အသင်း ရဲ့ အပြီးသတ် ကစားသမား စာရင်း မှာ မပါဝင် ထားပေမယ့် အစ္စတန်ဘူလ် သို့ လိုက်ပါ လာတဲ့ ကစားသမား တွေထဲမှာတော့ ပါဝင် ခဲ့ကြောင်း သိရပါတယ် ။

* ချယ်လ်ဆီး အသင်း ရဲ့ ဝါရင့် တောင်ပံ တိုက်စစ် ကစားသမား ပတ်ဒရို က ၄င်းတို့ အနေနဲ့ ယနေ့ည လီဗာပူး အသင်း နဲ့ စူပါဖလား ဗိုလ်လု ပွဲစဉ် တွေကို အထူး သတိထား ချဉ်းကပ် ရမှာ ဖြစ်ပြီး အာရုံစိုက်မှု အပြည့် နဲ့ ကစား ရမှာ ဖြစ်ကြောင်း ၊ တိုက်စစ် အတွက် လုံလောက်တဲ့ အခွင့်အရေး ဖန်တီးမှု တွေနဲ့ အဆုံးသတ် လည်း လိုအပ်ကြောင်း မနေ့က ပွဲကြို သတင်းစာ ရှင်းလင်းပွဲ မှာ ဆိုခဲ့ပါတယ် ။

* မနေ့ည က ပွဲစဉ်များ အပြီး ချယ်လ်ဆီး အငှား ကစားသမားများရဲ့ ခြေစွမ်းများ
ဒူဂျွန် စတားလင်း ( ဝီဂန် ) ( ပွဲချိန်ပြည့် )
လုခ် မက်ကောမစ် ( ရှရူးဘူရီတောင်း ) ( ပွဲချိန်ပြည့် )
ဂျော့ခ်ျ ဂရန့် ( ပလိုင်းမောက် ) ( ပွဲချိန်ပြည့် )
မတ် မီယေဇဂါ ( ရီးဒင်း ) ( ပါဝင်ခွင့်မရ )

SPORTS MYANMAR