မန်ချက်စတာ ယူနိုက်တက် ဆိုတဲ့ အမည်ကို ဘောလုံး ဝါသနာရှင်တိုင်း သိကြပါတယ်။အင်္ဂလန် ဘောလုံး လောက ရဲ့ အောင်မြင်မှု အရှိဆုံး ကလပ် အသင်းကြီး ဟာ ကမ္ဘာ တစ်ဝှမ်းမှာပရိသတ် မြောက်များစွာ ကို လည်း ပိုင်ဆိုင် ထားပါတယ် ။ နယူတန် ဟိသ် ဆိုတဲ့ အမည်ကနေစတင်ခဲ့တဲ့ မန်ချက်စတာ ယူနိုက်တက် မှာ အမည် ပေါင်း များစွာ ရှိပါတယ် ။ Man UTD, MUFC, United, Red Devils တို့တွေပါ ။ ဒါပေမယ့် Man U ( မန်ယူ ) ဆိုတဲ့ အမည် ကိုတော့ဘယ်မန်ချက်စတာ ယူနိုက်တက် ပရိသတ်မှ မသုံးကြပါဘူး ။

ဒီအခေါ်အဝေါ်ဟာယူနိုက်တက်ပရိသတ်တွေမသုံးကြရုံတင်မကပါဘူး၊အသင်းအပေါ်လေးစားမှု မရှိတဲ့ လုပ်ရပ် ၊ အသင်းကို စော်ကားတဲ့ အခေါ် အဝေါ်အဖြစ်မှတ်ယူထားကြပါတယ်။ဒါကြောင့် အိုးထရက်ဖိုဒ့် ကွင်းထဲ ကို ရောက်သွား ခဲ့မယ်ဆိုရင် မန်ယူ ဆိုတာကို မပြောမိ စေဖို့ သတိပေး ပါရစေ ။

ဘာကြောင့် ( မန်ယူ ) ဆိုတဲ့ အသုံးအနှုန်း ဟာ မန်ချက်စတာ ယူနိုက်တက် အပေါ် စော်ကားရာ ရောက်ခဲ့တာလဲ ?ဒါတွေအားလုံးဟာယူနိုက်တက်သမိုင်းထဲကဝမ်းနည်းကြေကွဲစရာအဖြစ်တစ်ခု ကနေ စတင်ခဲ့ ပါတယ် ။ အဲ့ဒါ ကတော့ မြူးနစ် လေယာဉ် ပျက်ကျမှု ပါပဲ ။

၁၉၅၀ နှစ်များမှာ မန်ချက်စတာ ယူနိုက်တက် ဟာ နည်းပြကြီး မတ်ဘတ်စ်ဘီ ရဲ့ ဦးဆောင်မှု နဲ့ ပြည်တွင်းမှာအောင်မြင်မှုတွေစိုက်ထူနေခဲ့ပါတယ်။“BusbyBabies”လို့လူသိများတဲ့မန်ချက်စတာ ယူနိုက်တက် ကစား သမားတွေ ဟာ ဥရောပ ဘောလုံး လောကမှာ ကျော်ကြား နေကြပြီး အနာဂါတ် ရဲ့ ထိပ်တန်း ကစား သမားတွေ ဖြစ်လာဖို့ အရှိန်အဟုန် နဲ့ ချီတက် နေခဲ့ကြ ပါတယ် ။

ဒါပေမယ့် ၁၉၅၈ ခုနှစ် ၊ ဖေဖော်ဝါရီ လ၆ရက်နေ့မှာတော့ကြမ္မာဆိုးဝင်ခဲ့ရပါတယ်။ယူနိုက်တက် ဟာချန်ပီယံလိဂ်(ထိုစဉ်ကဥရောပဖလား)ကွာတားဖိုင်နယ်ဒုတိယအကျော့ကိုယူဂိုဆလားဗီးယား မှာ သွားရောက် ကစားခဲ့ပါတယ် ။ ရက်စတား ဘဲဂရိတ် ကို နှစ်ကျော့ပေါင်း ရလဒ်အသာနဲ့ ဆီမီး ဖိုင်နယ် ကို တက်ရောက်နိုင်ခဲ့ကာ အင်္ဂလန် ကို ပျော်ရွှင်စွာ ပြန်လာ ခဲ့ကြ ပါတယ် ။

ဒါပေမယ့် သူတို့ကို စောင့်ကြို နေတဲ့ ကြမ္မာဆိုး ကိုတော့ မမြင်ခဲ့ ကြပါဘူး ။ မြူးနစ် လေဆိပ်မှာ ဆီဖြည့်အပြီးပြန်တက်လာတဲ့လေယာဉ်ဟာပြေးလမ်းချော်တိမ်းမှောက်ခဲ့ပါတယ်။လေယာဉ်ပေါ်မှာ မန်ချက် စတာ ယူနိုက်တက် အသင်း ၊ မီဒီယာသမား၊ဂျာနယ်လစ်နဲ့သတင်းထောက်တွေ ပါဝင် ခဲ့ကြပြီး စုစုပေါင်း ခရီးသည် ၄၄ ဦး မှာ ၂၃ ဦး သေဆုံး ခဲ့ပါတယ် ။

မန်ချက်စတာ ယူနိုက်တက် ကစား သမား 7 ဦး ဟာ အခင်းဖြစ်ပွား ရာမှာတင် ပွဲချင်းပြီးသေဆုံး ခဲ့ကြပြီး လူငယ်လေး ဒန်ကန် အက်ဒွပ် ကတော့ ဆေးရုံ ရောက်ပြီးမှ ကွယ်လွန် ခဲ့ ပါတယ် ။ ဒါဟာ မန်ချက်စတာ ယူနိုက်တက်အသင်းရဲ့သမိုင်းမှာမကြုံဖူးတဲ့ကြောက်မက်ထိတ်လန့်ဖွယ်ရာ အဖြစ်ဆိုးကြီး ဖြစ်ခဲ့ကာ ဘယ်တော့မှ ဦးပြန်မော့ မလာနိုင်မှာ ကို စိုးရိမ် ခဲ့ကြ ပါတယ် ။

ဒါပေမယ့် နည်းပြကြီး မက်ဘတ်စ်ဘီ ( နောက်ပိုင်းတွင် ဆာမတ်စ်ဘတ်စ်ဘီ ) ဟာ အသင်းကို ပြန်လည် ဦးဆောင်ခဲ့ ပါတယ် ။ မြူးနစ် ဖြစ်ရပ်ဆိုး အပြီး ၁၀ နှစ် အကြာမှာတော့မန်ချက်စတာ ယူနိုက်တက် အသင်းဟာ ဥရောပ ဖလား ကို ရယူ နိုင်ခဲ့ပြီး ဒီကနေ့ အောင်မြင်မှုတွေ အတွက် ပထမဆုံး မှတ်တိုင် ကို စိုက်ထူပေးခဲ့ ပါတယ် ။

 

ဒီနေ့မှာတော့ဆာဘော်ဘီချာတန်ဟာမြူးနစ်ဖြစ်ရပ်ဆိုးကနေအသက်ရှင်ကျန်ရစ်ခဲ့တဲ့နောက်ဆုံး ဘောလုံး သမား အဖြစ် ရှင်သန် နေခဲ့ပါတယ်။ဒီအဖြစ်ဆိုးကြီးဟာယူနိုက်တက်အတွက်သာ မက ဘောလုံး လောက တစ်ခုလုံး အတွက်ပါ ဝမ်းနည်း ကြေကွဲ စရာ ဖြစ်စေခဲ့ ပါတယ် ။

ဘောလုံးအသင်းပရိသတ်တွေဟာကိုယ်နဲ့ယှဉ်ပြိုင်ကစားတဲ့ပြိုင်ဘက်အသင်းတွေရဲ့ဆိုးကွက်တွေ ကို အော်ဟစ် ပြောဆို လှောင်ပြောင် လေ့ ရှိပါတယ် ။ ဒါက ဘောလုံး ရဲ့ ဓလေ့ တစ်ခုပါပဲ ။ ဒါပေမယ့် ဒီလို ဝမ်းနည်း ကြေကွဲ စရာ အဖြစ်ဆိုးကိုတော့ ပြောဆို လှောင်ပြောင်တာဟာ မဖြစ်သင့်တဲ့ အရာပါ ။

ဒါပေမယ့်ပရိသတ်အချို့ကစည်းမရှိကြပါဘူး။ဝက်စ်ဘရွန်းအသင်းပရိသတ်တွေဟာယူနိုက်တက် ရဲ့ မြူးနစ် ဖြစ်ရပ်ဆိုးကို သီချင်းစာသား လုပ်ပြီး သီဆို ရာကနေ ( မန်ယူ ) ဆိုတဲ့ အမည် အစပြု လာခဲ့ ပါတော့တယ် ။

“Man U, Man U
Went on the Plane
Man U, Man U
Never came back again” ဆိုတဲ့စာသားကိုအဆိုပါအချိန်တုန်းကဝက်စ်ဘရွန်းပရိသတ်တွေဟာ မန်ချက် စတာ ယူနိုက်တက် နဲ့ ဆုံတွေ့တဲ့ ပွဲတွေ မှာ သီဆို ခဲ့ကြ ပါတယ် ။ ဒါ့အပြင် “Man U never intended coming home” ဆိုတဲ့ စာသား ကလည်း ယူနိုက်တက် ပရိသတ်တွေ ကို ဒေါသထွက် စေခဲ့ ပါတယ် ။ ဘာကြောင့်လဲ ဆိုတော့ အဲ့ဒိ စာသားရဲ့ အစ စာလုံး ၅ လုံးဟုMUNICHဆိုတဲ့အဓိပ္ပါယ် ကို ဖြစ်စေ လို့ပါပဲ ။

ဒါကြောင့် ( မန်ယူ ) ဆိုတဲ့ အသုံးအနှုန်း ဟာ မန်ချက်စတာယူနိုက်တက်အသင်းကိုစော်ကားရာ ရောက်ပြီး လူပေါင်း များစွာ သေဆုံးခဲ့ရမှု အပေါ် လှောင်ပြောင်တဲ့ အသွင် သက်ရောက်တာ ကြောင့် ယူနိုက်တက် ပရိသတ်တွေ ဟာ အဆိုပါ အသုံးအနှုန်း ကို နှစ်သက် သဘောကျခြင်း မရှိခဲ့တာပဲ ဖြစ်ပါတယ် ။

မန်ချက်စတာ ယူနိုက်တက် မှာ အမည်တွေ အများကြီး ရှိပါတယ် ။ အခြား အမည်တွေကိုလည်း ကြိုက်သလို ခေါ်လို့လည်း ရပါတယ် ။ ဒါပေမယ့် ( မန်ယူ ) ဆိုတာ ကိုတော့ ခေါ်ဖို့ မသင့်ပါဘူး . . . . .
Ref – Oh My Goal

SPORTS MYANMAR