ဘာစီလိုနာ ကနေ ထွက်ခွာရတော့မယ့် လီယွန်နယ် မက်ဆီ ဟာ ဒီကနေ့မှာ သတင်းစာ ရှင်းလင်းပွဲကို နူးကမ့် ကွင်းမှာ ပြုလုပ် သွားခဲ့ ပါတယ် ။ ဘာစီလိုနာ မှာ ဆက်ကစားချင် ပေမယ့် မဖြစ်နိုင်တော့ တာကြောင့် လမ်းမခွဲချင်ဘဲ လမ်းခွဲ ခဲ့ရတဲ့ မက်ဆီ ဟာ သတင်းစာရှင်းလင်းပွဲကို ညှိုးငယ်တဲ့ မျက်ဝန်း အစုံနဲ့ တက်ရောက် လာခဲ့ပြီး ဘာမှ စမပြောရခင်မှာဘဲ ဝမ်းနည်းစိတ်ကြောင့် ငိုကြွေး ခဲ့ရ ပါတယ် ။

 

ဒီ သတင်းစာ ရှင်းလင်းပွဲကို မီဒီယာတွေ အပြင် မက်ဆီ ရဲ့ သား ၃ ယောက် နဲ့ ဇနီးသည် ၊ ဘာစီလိုနာ ဥက္ကဌ လာပေါ်တာ ၊ အသင်းဖော်တွေ ဖြစ်တဲ့ ဂရစ်ဇ်မန်း ၊ ပီကေး ၊ အမ်တီတီ နဲ့ ဖရန်ကီ ဒီယွန်တို့ တက်ရောက် ခဲ့ကြပါတယ် ။

 

မက်ဆီ ဟာ နှုတ်ဆက် စကားပြောဆို နေစဉ်အတွင်း ဝမ်းနည်း စိတ်ကို မဖုံးမိ ထားနိုင်ဘဲ မကြာခဏ မျက်ရည် သုတ်ခဲ့ရသလို စကားပြောဆို အပြီး အားလုံးက မတ်တပ်ရပ် လက်ခုပ်တီးကာ ဂုဏ်ပြု ချိန်မှာလည်း အာဂျင်တီးနားသားဟာ ငိုကြွေး နေခဲ့ပါတယ် ။ နောက်ဆုံး မှာတော့ ၁၇ နှစ် နဲ့ ရက်ပေါင်း ၁၀၀ ကျော် ကြာတဲ့ ဇာတ်လမ်း တစ်ပုဒ် ဟာ နိဂုန်းချုပ် ခဲ့ရပါပြီ ။

 

“နှစ်တွေ အများကြီး ကြာခဲ့ပြီးတဲ့ နောက် ဒါဟာ ကျွန်တော့ အတွက် ၊ ကျွန်တော့ ဘ၀ မှာ အရမ်း အရမ်းကို ခက်ခဲတဲ့ ကိစ္စ ဖြစ်စေခဲ့ ပါတယ် ။ ဒီကိစ္စ အတွက် ကျွန်တော် အဆင်သင့် မဖြစ်သေး ပါဘူး ။ ဒီနှစ် မှာ ကျွန်တော် မိသားစု က ဒီ ဘာစီလိုနာ မှာပဲ ဆက်နေဖြစ်မယ်လို့ ထင်ခဲ့ကြတာပါ ။ ဒီမြို့မှာ နေခဲ့တဲ့ အချိန်တွေ ၊ ဒီမှာ ကစားခဲ့ရတဲ့ အချိန်တွေက အရမ်းကို အံ့သြစရာတွေ ပါပဲ”

 

“ဒါပေမယ့် ဒီနေ့ မှာတော့ ဒါတွေကို ကျွန်တော် နှုတ်ဆက် စကားပြောဖို့ ဖြစ်လာခဲ့ ပါပြီ ။ ဒီကို ကျွန်တော့ အသက် ၁၃ နှစ်ကတည်းက ရောက်လာခဲ့တာပါ ၊ အခု ၂၁ နှစ်တောင် ကြာခဲ့ပါပြီ ။ ကျွန်တော့ ဇနီး ရယ် ကတ်တလန်သွေး ပါတဲ့ အာဂျင်တီးနားသားလေး ၃ ယောက်နဲ့ အတူ ထွက်သွားတော့မှာပါ”

 

“ကျွန်တော် ပြန်လာမှာ မဟုတ်ဘူးလို့ မပြောနိုင်ပါဘူး ။ ဒီက ကျွန်တော့ရဲ့ လက်ရှိ အသင်းဖော်တွေ ၊ အသင်းဖော် ဟောင်းတွေ ၊ ကလပ်မှာ ကျွန်တော်နဲ့ အတူ ရှိခဲ့တဲ့သူတွေ ၊ ရှိနေတဲ့သူတွေ ၊ ခန လောက်ပဲ ခင်မင် ခဲ့ရသူတွေ ၊ ပရိသတ်တွေ အားလုံးဟာ ကျွန်တော့ အတွက် တကယ့်ကို ခမ်းနားတဲ့ အမှတ်တရ တွေပါပဲ”

 

“အရမ်း ကြည်နူး ပျော်ရွှင်စရာ ကောင်းတဲ့ အရာတွေ ရှိခဲ့ ပါတယ် ။ အဲ့ဒိလိုပဲ ဆိုးရွားတဲ့ ကာလတွေ ကိုလည်း ဖြတ်ခဲ့ရတာပါ ။ ဒါပေမယ့် အားလုံးက ကျွန်တော့ကို ပိုကောင်းလာအောင် ကူညီခဲ့တယ် ၊ တိုးတက် လာအောင် လုပ်ပေးခဲ့တယ် ၊ ဒီကနေ့ ဒီလိုမျိုး ဖြစ်လာအောင် အားလုံးက ဝိုင်းကူ ပေးခဲ့ကြပါတယ် ။ ဒီကလပ် နဲ့ ဒီ ဂျာစီ အတွက် ပထမဆုံးစတင်တဲ့ နေ့ကနေ နောက်ဆုံး အဆုံးသတ်တဲ့ နေ့အထိ ကျွန်တော် အစွမ်းကုန် ပေးဆပ် ခဲ့တာပါ”

 

“အခု ကျွန်တော် ထွက်သွား ပါတော့မယ် ၊ ဒါက အမှန်တရား ပါပဲ ။ ကျွန်တော့ အပေါ် အရမ်း ဂရုစိုက် ကြင်နာမှုတွေ အတွက် အရမ်း ဝမ်းသာမိပါတယ် ။ ဒီလို နှုတ်ဆက်ရမယ်လို့ ကျွန်တော်လုံး၀ မျှော်လင့် မထားခဲ့ တာပါ”

Trophies won while Lionel Messi played for Barcelona are displayed before a press conference at the Camp Nou stadium in Barcelona, Spain, Sunday, Aug. 8, 2021. FC Barcelona had previously announced the negotiations with Lionel Messi had ended and that Messi would be leaving the club. (AP Photo/Joan Monfort)

 

“ပရိသတ်တွေ ကို ၁ နှစ် ခွဲလောက် မမြင်ရဘဲ ဒီကလပ်ကြီး ကနေ ထွက်သွားရတာ ကျွန်တော့ကို အရမ်း စိတ်မကောင်း ဖြစ်စေပါတယ် ။ နူးကမ့် ကွင်းအပြည့် ရှိနေတဲ့ ပရိသတ်ကြီးရဲ့ အလယ်မှာ နှုတ်ဆက် စကားပြောပြီး ထွက်သွားချင်တာက ကျွန်တော့ရဲ့ စိတ်ကူးအမှန်ပါပဲ ၊ အခု ဒါက မဖြစ်နိုင်တော့ပါဘူး” လို့ မက်ဆီ က သူ့ရဲ့ နှုတ်ဆက်စကားကို စတင်ပြောဆိုခဲ့ ပါတယ် ။ အဲ့ဒိ နောက်မှာတော့ သတင်းထောက်တွေရဲ့ မေးခွန်းတွေကို မက်ဆီက စတင်ဖြေကြား ပေးသွားခဲ့ ပါတယ် ။

 

မေး – ဘာစီလိုနာက အကောင်းဆုံး အခိုက်အတန့်က ဘာဖြစ်မလဲ ?

မက်ဆီ – အခိုက်အတန့် တစ်ခုခု တည်းကို ရွေးလိုက်ဖို့က အရမ်းခက်ပါတယ် ။ ကျွန်တော် ဘာစီလိုနာ နဲ့ စပြီး ပွဲထွက်တဲ့ အချိန် ဖြစ်ကောင်း ဖြစ်နိုင်ပါတယ် ၊ ဒါက ကျွန်တော့ရဲ့ အိပ်မက်တွေ တကယ် ဖြစ်လာခဲ့တဲ့ အခိုက်အတန့် ပါပဲ ။ အဲ့ဒိ နောက်ပိုင်း ဖြစ်လာတာတွေကတော့ တကယ့် အံ့ဖွယ်တွေပါ ။ ရွေးထုတ်ဖို့ ခက်ပေမယ့် အားလုံးကို အမှတ်ရနေမှာကတော့ အသေအချာပါပဲ ။

 

မေး – စာချုပ်သစ် ပြန်ချုပ်လိမ့်မယ်လို့ ထင်ထားခဲ့တာလား ?

မက်ဆီ – လာပေါ်တာ ပြောခဲ့သလိုပါပဲ ။ ကျွန်တော်တို့ အားလုံး သဘောတူထားခဲ့ ပြီးပါပြီ ။ ဒါပေမယ့် နောက်ဆုံး မိနစ်မှာ ဒါက ဖြစ်မလာခဲ့ပါဘူး ။ ကျွန်တော် နဲ့ ပတ်သက်ပြီး ပြောဆိုနေတာတွေကို ကြားရပါတယ် ။ ကျွန်တော်က စိတ်ခံစားချက် အတိုင်း ပြောတဲ့သူပါ ၊ မနှစ်က ဒီမှာ မနေချင်ဘူးလို့ ကျွန်တော် ပြောခဲ့ဖူးပါတယ် ။ ဒီနှစ် မှာတော့ ဒီမှာ ကျွန်တော် ဆက်နေချင်ခဲ့တာပါ ။ ဖြစ်လာအောင်လည်း အတတ်နိုင်ဆုံး ကြိုးစားခဲ့ ပါတယ် ။ ဒါပေမယ့် ကလပ်အသင်းဘက်က မလုပ်နိုင်ခဲ့ပါဘူး ၊ ဘာလို့လည်း ဆိုတော့ လာလီဂါ ကြောင့်ပါ ။ ဒါကို လက်ခံပြီး ရှေ့ဆက်ရတော့ မှာပါပဲ ။

 

မေး – ဘာစီလိုနာ က မင်းကို ဆက်ထိန်းထားဖို့ အစွမ်းကုန် လုပ်ခဲ့တယ်လို့ ထင်သလား ?

မက်ဆီ – မသိပါဘူး ၊ သေချာပေါက် ပြောနိုင်တာကတော့ ကျွန်တော့ ဘက်က လုပ်နိုင်သမျှ အစွမ်းကုန် လုပ်ခဲ့တယ် ဆိုတာပါပဲ ။ ကျွန်တော့ရဲ့ ဘက်ကနေ ဒီမှာ ဆက်နေရဖို့ အတွက် အရာအားလုံး လုပ်ခဲ့ပါတယ် ။

 

မေး – ဒါက မင်း အတွက် အခက်ခဲဆုံး ဖြစ်နေမလား ?

မက်ဆီ – အခု ခေါင်းထဲမှာ အများကြီး ရောထွေးနေပါတယ် ။ ဒါပေမယ့် ခုချိန်ထိတော့ ကျွန်တော် မပြိုလဲ သေးပါဘူး ။ ဒီကလပ်ရဲ့ ပထမအသင်းမှာ ၁၆ နှစ်ကျော် ကစားလာခဲ့ပြီး အခုလို ထွက်ခွာရတာကတော့ ကျွန်တော့ အတွက်ရော ကျွန်တော့ မိသားစု အတွက်ပါ ခက်ခဲ စေခဲ့ပါတယ် ။ ရှေ့ဆက်ပြီး ဘာဆက်ဖြစ်လာမယ် ဆိုတာအတွက် ကျွန်တော်တို့ အဆင်သင့် ဖြစ်နေဖို့ ကြိုးစားရမှာပါ ။

 

မေး – PSG က နောက်ပြောင်းမယ့် အသင်းလား ?

မက်ဆီ – ဖြစ်နိုင်ပါတယ် ၊ ဒါပေမယ့် ခုချိန်ထိတော့ ဘာနဲ့မှ သဘောတူထားတာမျိုး မရှိသေးပါဘူး ။ ဒီကိစ္စ သတင်းထွက်ပြီးတာနဲ့ ကလပ် အသင်းအများကြီးက ကမ်းလှမ်းမှုတွေ ရောက်လာခဲ့ ပါတယ် ။ ခုထိတော့ ဘာကိုမှ အတည်မပြုနိုင်သေးပါဘူး ၊ ဒါပေမယ့် ကျွန်တော်တို့ ဆက်လုပ်နေပါတယ် ။

 

မေး – ဒီကလပ် မှာ မင်း ဘယ်လို အမွေအနှစ်မျိုး ချန်ရစ်ထားခဲ့တယ်လို့ ထင်သလဲ ?

မက်ဆီ – ကျွန်တော် က ကလပ် အသင်း နဲ့ အတူ မြင့်တက်လာခဲ့တာပါ ၊ ဘာစီလိုနာ အောင်မြင်သလို ကျွန်တော်လည်း အောင်မြင်ခဲ့ ပါတယ် ။ ဒီအတိုင်းပဲ မြင်စေချင်ပါတယ် ။ လူတွေ ကျွန်တော့ကို မြင်တဲ့ အမြင်ကတော့ သူတို့ရဲ့ စိတ်ခံစားချက် နဲ့ ရွေးချယ်မှု အပေါ်မှာပဲ မူတည်မှာပါ ။ ဆုဖလားတွေ ရော ရှုံးနိမ့်မှုတွေပါ ကျွန်တော်တို့ကို ပိုပြီး တိုးတက် လာစေခဲ့ပါတယ် ။ မပျော်ရတဲ့ အချိန်တွေထက် ပျော်ရတဲ့ အချိန်တွေက ပိုများခဲ့တာတော့ အသေအချာပါပဲ ။

 

မေး – ဒါက မင်း ဘ၀ မှာ အခက်ခဲဆုံး အခိုက်အတန့်လား ?

မက်ဆီ – သံသယ ဖြစ်စရာမရှိပါဘူး ။ အခက်ခဲဆုံးပါပဲ ။ နာကျင်စရာ ကောင်းတဲ့ ရှုံးပွဲတွေ ရှိခဲ့ဖူးပါတယ် ။ ဒါပေမယ့် ဘောလုံးမှာ ဒါကို တုန့်ပြန်ဖို့ အခွင့်အရေး အမြဲတမ်း ရှိပါတယ် ။ ဒီကိစ္စ မှာတော့ ဒါမျိုး မရှိပါဘူး ။ အခု ကျွန်တော် အရမ်း ဝမ်းနည်း နေပါတယ် ၊ ကျွန်တော် ချစ်ရတဲ့ အသင်းကနေ ထွက်ရတော့မှာပါ ။ ဒါကို မျှော်လင့် မထားပါဘူး ၊ မနှစ်က တကယ်ထွက်ချင်ခဲ့တာပါ ၊ ဒီနှစ်တော့ ဒီမှာပဲ ဆက်နေချင်ခဲ့တာပါ ။

 

မေး – မင်း မရှိတော့တဲ့ ဘာစီလိုနာ ကို ဘယ်လိုများ ပုံဖော်ကြည့်မိလဲ ?

မက်ဆီ – အသင်းက တောင့်တင်း ပါတယ် ။ တခြား ကစားသမားတွေလည်း ထပ်ရောက်လာ ဦးမှာပါ ။ ဘောလုံး သမား ဆိုတာကတော့ ဝင်လိုက် ထွက်လိုက် ပါပဲ ။ လာပေါ်တာ ပြောခဲ့သလိုပါပဲ ၊ ဘာစီလိုနာ ဆိုတဲ့ ကလပ်ဟာ လူတစ်ဦး တစ်ယောက်ထက် ပိုပြီး အရေးကြီးပါတယ် ။

 

ဒါကို လူတွေ အသားကျဖို့ လိုပါတယ် ။ စစချင်းတော့ ဒါက ထူးဆန်းပြီး နားလည်ဖို့ ခက်နေမှာပါ ။ ဒါပေမယ့် သူတို့ အသားကျနေဖို့ လိုပါတယ် ။ ရွေးကောက်ပွဲ အပြီးမှာ ဥက္ကဌသစ် ( လာပေါ်တာ ) နဲ့ ကျွန်တော် နေ့လည်စာ စားခဲ့ပြီး ဆက်နေဖို့ ဆွေးနွေးခဲ့ ကြပါတယ် ။ ဘာပြဿနာ မှ မရှိခဲ့ပါဘူး ။ စာချုပ်က ဘယ်တုန်းကမှ ပြဿနာ မဖြစ်ခဲ့တာပါ ။ ဒါပေမယ့် အခု မဖြစ်နိုင်တော့ပါဘူး ။

 

မေး – ပရိသတ်တွေကို တွေ့ဖို့ ပြန်လာဦးမှာလား ?

မက်ဆီ – ဒါပေါ့ ။ ဒါပေမယ့် အရင်တုန်းကနဲ့တော့ တူမှာ မဟုတ်တော့ပါဘူး ။ ကျွန်တော် လိုချင်နေတာက အခုအခိုက် အတန့် မှာပါ ။ ဒါပေမယ့်လည်း ဒီကလပ်အတွက်ဆိုရင် ဘာမဆိုလုပ်ပေးဖို့ အဆင်သင့် ပါပဲ ။

 

မေး – လာလီဂါ ဥက္ကဌ ( ဂျာဗီယာ တီဘတ်စ် ) အတွက် ဘာများပြောချင်ပါသလဲ ? သူက မင်းဆက်နေရဖို့ အကုန်လုပ်ပေးခဲ့တယ်လို့ ပြောခဲ့တယ်နော်

မက်ဆီ – ကျွန်တော် သိတာကတော့ လာလီဂါ ကြောင့် ကျွန်တော်တို့ ရှေ့မဆက် နိုင်ခဲ့တာပါ ။ ကလပ် ရဲ့ အကြွေးတွေက များပါတယ် ၊ နောက်ထပ် အကြွေးထပ် အတင် မခံချင်တော့ ပါဘူး ။ သူ့အတွက်တော့ ကျွန်တော် ဘာမှ ပြောစရာ မရှိပါဘူး ။ သူနဲ့ ကျွန်တော့ကြားမှာ ဘာပြဿနာ မှလည်း မရှိပါဘူး ။

 

မေး – ဇာဗီ နဲ့ အင်နီယေစတာ တို့က ဘာစီလိုနာ ကနေ အဝေးကြီးကို ထွက်ပြီး ကစားခဲ့ကြတယ်နော် ၊ မင်း ( ဥရောပ ကလပ်တသင်းသင်းကို ရွေးခဲ့မယ်ဆိုရင် ) ဘာစီလိုနာ နဲ့ ပြန်ရင်ဆိုင်ရနိုင်တယ် ၊ ဘယ်လိုခံစားရမလဲ ?

မက်ဆီ – ကျွန်တော် ဘယ်လိုလူမျိုး ၊ ဘယ်လို စိတ်ဓါတ် ရှိတယ် ဆိုတာ လူတွေ ကောင်းကောင်း သိမှာပါ ။ ကျွန်တော် က အနိုင်ရတာကို နှစ်သက်ပါတယ် ။ နောက်ဆုံး ရာသီတွေမှာ ဆုဖလားတွေ အတွက် ကျွန်တော် တိုက်ပွဲဝင်ချင်ခဲ့ ပါတယ် ။ ဒါနီ အဲလ်ဗက် ကို ဂုဏ်ပြုချင်ပါတယ် ( အိုလံပစ် ရွှေတံဆိပ် ရခဲ့သည် ) ၊ သူ့ထက် ကျွန်တော် ဖလားတွေ ပိုများချင်ပါတယ် ( အဲလ်ဗက် ၄၃ ၊ မက်ဆီ ၃၈ ) ။

 

မေး – အိုင်ဘီဇာ မှာ တုန်းက PSG ကစားသမားတွေနဲ့ ဓါတ်ပုံ ရိုက်ခဲ့တယ်နော်

မက်ဆီ – ဒါက တကယ့်ကို တိုက်ဆိုင် ခဲ့တာပါ ။ ပါရီဒက်စ် နဲ့ ဒီမာရီယာ တို့ကို တွေ့ဖို့ ကျွန်တော် သွားခဲ့တာပါ ။ နေမာ က ကျွန်တော့ကို လှမ်းခေါ်ပါတယ် ၊ ပါရီဒက်စ် ဒီမာရီယာ တို့နဲ့ အတူ ရှိနေတာလို့ ပြန်ဖြေတော့ အားလုံး လာခဲ့ဖို့ သူက ထပ်ပြောပါတယ် ။ ကျွ်တော်တို့ ဓါတ်ပုံ အတူ ရိုက်ခဲ့ကြတယ် ၊ ပြီးတော့ PSG ကို လာခဲ့ဖို့ သူ ပြောပါတယ် ၊ ဒါက ဟာသအနေနဲ့ပြောခဲ့ ကြတာပါ ။ ဒီလောက်ပါပဲ ။

 

မေး – ဒီမှာ ဆက်နေဖို့ မယုံနိုင်လောက်တဲ့ အရာတစ်ခုခု လုပ်ဖို့ စဉ်းစားထားသလား ?

မက်ဆီ – ဆက်နေဖို့ အစွမ်းကုန်လုပ်ခဲ့ပြီး ပါပြီ ။ ထပ်ပြီး ထည့်ဖို့ မဖြစ်နိုင်တော့ပါဘူး ။

 

မေး – မင်း လစာတွေ လျော့ယူဖို့ ဖိအားပေးခံရတယ်ဆို ၊ အဲ့ဒါက ဒီပြဿနာကို မဖြေရှင်းနိုင်ခဲ့ဘူးလား ?

မက်ဆီ – လစာ ၃၀% ပဲ ယူဖို့ ဆိုတဲ့ သတင်းက အမှားကြီးပါ ။ ကျွန်တော်တို့ ၅၀% နဲ့ သဘောတူခဲ့ ကြတာပါ ။ ထပ်ပြီး လျော့ယူဖို့ ဘယ်သူမှ မပြောခဲ့ပါဘူး ။

 

မေး – တစ်ယောက်ယောက် မင်းကို လှည့်စား ခဲ့တယ်လို့ ရော မထင်မိဘူးလား ?

မက်ဆီ – ကျွန်တော်တို့ အားလုံး အကောင်းဆုံး ကြိုးစားခဲ့ပြီး အခု ဒါက ဖြစ်မလာ နိုင်ခဲ့ပါဘူး ။ ကျွန်တော် ပရိသတ်တွေကို အမြဲပဲ ပွင့်ပွင့်လင်းလင်း ပြောခဲ့ပါတယ် ၊ လိမ်ညာတာမျိုး မရှိခဲ့ပါဘူး ။ အသံတွေ သိပ်ထွက် မလာဘူးဆိုရင် လူတွေက အမျိုးမျိုး ထင်တတ်ကြပါတယ် ။ ဒါပေမယ့် ဒီ ထင်မြင်ချက်တွေက အလိမ်အညာတွေ ပါ ။

 

SPORTS MYANMAR